Rokka

ದೇವರನಾಮ: ರೊಕ್ಕ ಎರಡಕ್ಕು
ರಚನೆ: ಶ್ರೀ ಪುರಂದರ ದಾಸರು
ರಾಗ: ಪಂತುವರಾಳಿ
ತಾಳ: ಆಟ

ರೊಕ್ಕ ಎರಡಕ್ಕು ದುಃಖ ಕಾಣಕ್ಕ        ||ಪ||
           

ಮಕ್ಕಳ ಮರಿಗಳ ಮಾಡೋದು ರೊಕ್ಕ |       

ಸಕ್ಕರೆ ತುಪ್ಪವ ಸವಿಸೋದು ರೊಕ್ಕ |
ಕಕ್ಕುಲತೆಯನು ಬಿಡಿಸೋದು ರೊಕ್ಕ |
ಘಕ್ಕನೆ ಹೋದರೆ ಘಾತಕ ಕಾಣಕ್ಕ।।            ||೧||

ನೆಂಟರ ಇಷ್ಟರ ಮರೆಸೋದು ರೊಕ್ಕ |
ಕಂಟಕಗಳ ಪರಿಹರಿಸೋದು ರೊಕ್ಕ ||
ಗಂಟು ಕಟ್ಟಲಿಕ್ಕೆ ಕಲಿಸೋದು ರೊಕ್ಕ |
ತುಂಟತನಗಳ ಬಲಿಸೋದು ರೊಕ್ಕ ।।            ||೨||

ಇಲ್ಲದ ಗುಣಗಳ ತರಿಸೋದು ರೊಕ್ಕ |
ಸಲ್ಲದ ನಾಣ್ಯವ ನಡಿಸೋದು ರೊಕ್ಕ ।।
ಬೆಲ್ಲಕಿಂತಲೂ  ಬಹು ಸವಿಯಾದ ರೊಕ್ಕ |
ಇಲ್ಲದಿರಲು ಬಹು ದುಃಖ ಕಾಣಕ್ಕ ।।           ||೩||

ಉಂಟಾದ ಗುಣಗಳ ಮರೆಸೋದು ರೊಕ್ಕ |
ಬಂಟರನೆಲ್ಲರ ಬರಿಸೋದು ರೊಕ್ಕ ||
ಕಂಠಿ ಸರಿಗೆಯನ್ನು ಗಳಿಸೋದು ರೊಕ್ಕ |
ಒಂಟೆ ಕುದುರೆ ಆನೆ ತರಿಸೋದು ರೊಕ್ಕ।।             ||೪||

ವಿದ್ಯವ  ಮನುಜರ ಕಲೆಸೋದು ರೊಕ್ಕ |
ಹೊದ್ದಿದ ಜನರನು ಬಿಡಿಸೋದು ರೊಕ್ಕ ||
ಮುದ್ದು ಪುರಂದರ ವಿಠಲನ ಮರೆಸುವ |
ಬಿದ್ಹೋಗೋ ರೊಕ್ಕವ ಸುಡು ನೀನಕ್ಕ ।।               ||೫||

ಪುರಂದರ ದಾಸರು  ಅಂದು ಈ ಹಾಡನ್ನು ಸುಶ್ರಾವ್ಯವಾಗಿ  ಹಾಡಿ  ಸಾಮಾನ್ಯ ಜನರಿಗೆ  ರೊಕ್ಕದ ಮಹತ್ವ  ಸರಳ ಭಾಷೆಯಲ್ಲಿ  ಅರ್ಥ ಮಾಡಿಸಿದರು . ಕಾಲ ಕಳೆದಂತೆ ಹಲವಾರು ಗಾಯಕರು ದಾಸರು  ರಚನೆ ಮಾಡಿದ ಹಾಡುಗಳನ್ನು ಬೇರೆ ಬೇರೆ ರಾಗಗಳಲ್ಲಿ ಹಾಡಿ  ಜನರನ್ನು ರಂಜಿಸಿದ್ದಾರೆ . ಈಗ ಶ್ರೀಮತಿ . ಪಲ್ಲವಿ ಅರುಣ್  ರವರು  ಹೊಸ ಶೈಲಿಯಲ್ಲಿ ದೇವರನಾಮವನ್ನು  ಈಗಿನ ಯುವ ಪೀಳಿಗೆಗೆ ಇಷ್ಟವಾಗುವಂತೆ  ಹಾಡಿದ್ದಾರೆ . 

 

 

Youtube -