ಏಕೆ ಬೃಂದಾವನದಿ ನೆಲೆಸಿರುವೆ ಗುರುವೇ
ನಾಕವಿಲಸಿತಗೀತೆ ಲಾವಣ್ಯ ಮೂರ್ತೆ ।ಪ।
ಶ್ರೀಕಾಂತನೊಲಿಸಿದುದು ಸಾಕಾಗಲಿಲ್ಲೆಂದು
ಏಕಾಂತ ಬಯಸಿದೆಯ ಶ್ರೀ ರಾಘವೇಂದ್ರಾ ।।ಅ.ಪ।।
ಹಿಂದೆ ನಿನಗಾಗಿ ನರಹರಿಯು ಕಂಬದಿ ಬಂದ
ಮುಂದೆ ನಂದನ ಕಂದ ನಿನ್ನೆದುರು ಕುಣಿದ ।
ಒಂದು ಕ್ಷಣ ನಿನ್ನ ಬಿಟ್ಟಿರದೆ ಹರಿ ನಲಿಯುತಿರೆ
ಇನ್ಯಾರ ಒಲಿಸಲೆಂದಿಲ್ಲಿ ಇಲ್ಲಿ ತಪಗೈಯುತಿರುವೆ ।।೧।।
ಇಷ್ಟವಿಲ್ಲದ ರಾಜ್ಯವಾಳಿ ಬಹು ವರ್ಷಗಳು
ಶಿಷ್ಟ ನೀ ಬಹು ಬಳಲಿ ಆಯಸಗೊಂಡಿಹೆಯಾ ।
ದುಷ್ಟವಾದಿಗಳ ವಾಗ್ಯುದ್ಧದಲಿ ಜಯಸುತಲಿ
ಶ್ರೇಷ್ಟ ಗ್ರಂಥವ ಬರೆದು ಬೇಸರವಾಯ್ತು ।।೨।।
ಪರಿ ಪರಿ ಅಭೀಷ್ಟಗಳ ನೀಡೆಂದು ಜನ ಕಾಡೆ
ವರವಿತ್ತು ಸಾಕಾಯ್ತೆ ಕಮಲೇಶ ದಾಸ ।
ಧರಗೆ ಮರೆಯಾಗಿ ಬೃಂದಾವನವ ಸೇರಿದೊಡೆ
ಚರಣ ದಾಸರು ನಿನ್ನ ಬಿಡುವರೇನಯ್ಯಾ ।।೩।।
ವೀಣೆಯನು ನುಡಿಸುತಲಿ ವೇಣುಗೋಪಾಲನು
ಜಾಣತನದಲಿ ಮೆರೆಸಿ ಮೇರು ಮೆರೆದೆ ।
ಕಾಣದಿಹ ಪರಮಪದ ತಾಣವನು ತೋರುತ
ಪ್ರವೀಣ ಬೃಂದಾವನದಿ ಎದ್ದು ಬಾರಯ್ಯ ।।೪।।
No comments :
Post a Comment