ಬೃಂದಾವನೀ ದೇವಿ ವಂದಿಸುವೆ ಶ್ರೀತುಳಸಿ ಮಂದಿರಳೆ ನಿನ್ನ ಪದಕೆ
ವಂದಾರುಜನಸತಿಗೆ ಮಂದಾರಳೆನಿಸಿರುವಿ ಸಂದೇಹವಿಲ್ಲವಿದಕೆ।।
ಅಂದು ಧನ್ವಂತರಿಯು ತಂದಿರುವ ಪೀಯೂಷದಿಂದ ಪೂರಿತ ಕಳುಶದಿ
ಇಂದಿರಾಪತಿಯು ಆನಂದಭಾಷ್ಪೋದಕವ ಬಿಂದು ಬೀಳಲು ಜನಿಸಿದಿ ।
ಶ್ರೀತುಳಸಿ ನಿನ್ನನು ನಿಕೇತನದಿ ಪೂಜಿಪರ ಪಾತಕವ ಪರಿಹರಿಸುವೆ
ಶ್ರೀತರುಣಿಪತಿಗೆ ಬಲು ಪ್ರೀತೆವಿಷಯಳೇ ನಿನ್ನ ನಾ ಸ್ತುತಿಸಲೆಂತು ಜನನಿ ।
ಸರ್ವತೀರ್ಥಗಳೆಲ್ಲ ತರುಮೂಲದಲ್ಲಿಹವು ಸರ್ವವಿಭುದರು ಮಧ್ಯದಿ
ಸರ್ವವೇದಗಳೆಲ್ಲ ಸರ್ವಗ್ರ ಭಾಗದಲಿ ಇರುತಿಹರು ಬಿಡದೆ ನಿರುತ ।
ತುಳಸಿ ನಿನ್ನಯ ಲಕ್ಷದಳದಲಿಂದಲಿ ಲಕ್ಷ್ಮೀನಿಲಯದಲಿದಳರ್ಚಿಸೆ
ಕಳುಶಗಳ ಜೊತೆ ಮಾಡಿ ಬಲುಬೇಗ ಶ್ರೀಹರಿಯ ಒಲುಮೆ ಪಡೆವನು ಜಗದೊಳು ।
ತುಳಸಿ ದೇವಿಯೇ ನಿನಗೆ ಜಲವೆರೆದು ಕುಂಕುಮದ ತಿಲಕವಿಡುತಲಿ ನಿತ್ಯದೀ
ಲಲನೆಯರು ಪೂಜಿಸಲು ಒಲಿದಿತ್ತು ಸೌಭಾಗ್ಯ ಸಲಹುವೆ ಕರುಣದಿಂದ ।
ಮಾಧವಪ್ರಿಯ ತುಳಸಿ ಸಾದರದಿ ನಿನ್ನೊಳಗೆ ಶ್ರೀದೇವಿ ನಿಂದಿರುವಳು
ಮೋದಮುನಿ ಶಾಸ್ತ್ರಿಗಳು ಭೋದಿಸುವ ಬುಧಜನರು ಪಾದಸೇವೆಯಾ ಕರುಣಿಸು ।
ಮಿತ್ರನುದಯಲೆದ್ದು ಚಿತ್ತನಿರ್ಮಲನಾಗಿ ಭಕ್ತಿಯಲಿ ಶ್ರೀ ತುಳಸಿಯಾ
ಮೃತ್ತಿಕೆಯ ಧರಿಸಿದ ಮಹಾತ್ಮರನು ಕಂಡು ಯಮಭೃತ್ಯರಂಜುವರು ಭಯದಿ ।
ಇಂದು ಶ್ರೀ ತುಳಸಿ ಶ್ರೀಮಂತಿನಿಯ ಸ್ತೋತ್ರವ ನಿರಂತರದಿ ಪಠಿಸುವವರ
ಚಿಂತಿತಾಪ್ರದನಾಗಿ ನಿಂತು ಕಾರ್ಪರದಿ ಕಾಂತ ನರಹರಿ ತಾ ಪೊರೆವನು ।
ಬೃಂದಾವನೀ ದೇವಿ ವಂದಿಸುವೆ ಶ್ರೀತುಳಸಿ ಮಂದಿರಳೆ ನಿನ್ನ ಪದಕೆ
ವಂದಾರುಜನಸತಿಗೆ ಮಂದಾರಳೆನಿಸಿರುವಿ ಸಂದೇಹವಿಲ್ಲವಿದಕೆ।।
No comments :
Post a Comment