Baalu Ondu Belakinaata

ಬಾಳು  ಒಂದು  ಬೆಳಕಿನಾಟ ,ಆಸೆಯೊಂದು  ಕತ್ತಲಾಟ
ಸಾಗಿದೆ ಇದರೊಳಗೆ ,ಬೆಳಕು ಕತ್ತಲೋಟ  ||  ಬಾಳು ಒಂದು ||


ಹಕ್ಕಿ ರೆಕ್ಕೆ ಬಿಚ್ಚಿ ತಾನು , ಹರುಷದಲ್ಲಿ ಹಾರುವಂತೆ
ಮನಸು ತನ್ನ ಆಸೆ ಹೊತ್ತು , ಸಾಗುತಿಹುದು ಎತ್ತರಕೆ
ಎಲ್ಲೇ ಇಲ್ಲ ಬಾನಿನಲ್ಲಿ ,ಹಕ್ಕಿಗಿಲ್ಲ ನೆಲೆಯು ಅಲ್ಲಿ
ಕೊನೆಯೇ ಇಲ್ಲ ಆಸೆಗೆಂದು,ತಿಳಿಯದೇಕೆ  ಮನಸಿಗಿಂದು || ಬಾಳು ಒಂದು ||


ನದಿಯು ಕಡಲ ಸೇರಲೆಂದು ,ತವಕದಲ್ಲಿ ಓಡುವಂತೆ
ಓಡುತಿಹುದು  ಮನಸು ಏಕೆ ,ಆಸೆ ಎಂಬ ಕಡಲಿಗಿಂದು
ಯಾವ ನದಿಯು ಆದರೇನು,ಕದಲಿನೊಳಗೆ ಸಿಗುವುದೇನು
ಆಸೆ ತನ್ನ ಮಿತಿಯ ಮೀರಿ ,ನೂಕುತಿಹುದು ಆಳದಲ್ಲಿ || ಬಾಳು ಒಂದು ||


ಬಾನಿಗಿಲ್ಲ ಎಲ್ಲೇ ಅಲ್ಲಿ ,ಆಸೆಗಿಲ್ಲ ಕೊನೆಯು  ಇಲ್ಲಿ
ಏಕೆ ಕನಸು ಕಾಣುತಿಹುದು ,ಮನಸು ತಾನು ನೋವಲಿಂದು
ನಿಜವನರಿತು ಸಾಗುತಿರಲು ,ಹರುಷವಿಂದು  ಬಾಳಿನಲ್ಲಿ
ತಾಪವಿಲ್ಲ ಸೆಳಸವಿಲ್ಲ ,ಆಸೆ ತೊರೆದ ಮನಸಲೆಂದು || ಬಾಳು ಒಂದು ||